ஃபண்ட் கிளினிக் : இளம் வயது… கொஞ்சம் ரிஸ்க்… அதிக வருமானம்! – நீண்டகால முதலீட்டுக்கு டிப்ஸ்
ஃபண்ட் கிளினிக்
ஸ்மால்கேப்பில் முதலீடு செய்யும்போது அதிக வருமானம் கிடைக்கும் நிலையில் லாபத்தை எடுப்பது முக்கியமானது!
நான் 2018-ம் ஆண்டு முதல் பின்வரும் ஃபண்டுகளில் தலா ரூ.3,000 மாதம்தோறும் எஸ்.ஐ.பி முறையில் முதலீடு செய்து வருகிறேன். இந்த ஃபண்டுகள் எனக்கு நல்ல வருமானத்தைக் கொடுக்குமா? கூடுதலாக நான் ரூ.10,000 முதலீடு செய்யவும் தயாராக இருக்கிறேன்.
என்னுடைய முதலீடுகள்… எல் அண்ட் டி வேல்யூ ஃபண்ட், ஃப்ராங்க்ளின் இந்தியா ஃபோகஸ்டு ஃபண்ட், நிப்பான் இந்தியா ஸ்மால்கேப் ஃபண்ட்.
– ஆர்.கார்த்திகேயன், கோயம்புத்தூர்
“சிறிய வயதில் முதலீட்டைத் தொடங்கும்போது அது நிச்சயம் நீண்டகால இலக்குகளுக்காகவே இருக்கும். எனவே, போர்ட்ஃபோலியோவில் கொஞ்சம் மிட் அண்ட் ஸ்மால்கேப் முதலீட்டைச் சேர்ப்பது சிறிது ரிஸ்க் ஆனாலும் அதில் கூடுதல் வருமானம் கிடைக்க வாய்ப்புள்ளது.
அதேவேளையில், ஸ்மால்கேப்பில் முதலீடு செய்யும்போது அதிக வருமானம் கிடைக்கும்பட்சத்தில் லாபத்தை எடுப்பது ஒரு முக்கியமான அம்சம். உங்கள் போர்ட்ஃபோலியோவில் உள்ள எல் அண்ட் டி வேல்யூ ஃபண்ட் மற்றும் ஃப்ராங்க்ளின் இந்தியா ஃபோகஸ்டு ஃபண்டுகளை நிறுத்திவிட்டு, அதற்குப் பதிலாக, அட்டவணையில் (அடுத்த பக்கம் பார்க்க)தரப்பட்டுள்ள ஃபண்டுகளில் முதலீடு செய்யவும்.”
என் வயது 42. என்னுடைய ஓய்வுக்காலம், மூன்று குழந்தைகளின் கல்வி மற்றும் திருமணத்துக்காகப் பின்வரும் மியூச்சுவல் ஃபண்டுகளில் மொத்த முதலீடாகச் செய்துள்ளேன். நான் முதலீடு செய்துள்ள ஃபண்டுகள்… ஐசிஐசிஐ ஸ்மால்கேப் – ரூ.1.5 லட்சம், எஸ்.பி.ஐ ஸ்மால்கேப் – ரூ.11.5 லட்சம், நிப்பான் இந்தியா ஸ்மால்கேப் ஃபண்ட் – ரூ.2.5 லட்சம், ஃப்ராங்க்ளின் இந்தியா ஸ்மால்கேப் ஃபண்ட் – ரூ.5.5 லட்சம், டி.எஸ்.பி ஸ்மால்கேப் ஃபண்ட் – ரூ.10 லட்சம், ஆதித்ய பிர்லா ஸ்மால்கேப் ஃபண்ட் – ரூ.7 லட்சம், பி.என்.பி பரிபாஸ் மிட்கேப் ஃபண்ட் – ரூ.9 லட்சம், மோதிலால் மிட்கேப் 30 ஃபண்ட் – ரூ.13 லட்சம், ஹெச்.டி.எஃப்.சி மிட்கேப் ஆப்பர்ச்சூனிட்டீஸ் ஃபண்ட் – ரூ.8.5 லட்சம், மிரே அஸெட் எமெர்ஜிங் ஃபண்ட் – ரூ.7.5 லட்சம். இவையல்லாமல் எஸ்.பி.ஐ ஸ்மால்கேப் ஃபண்டில் ரூ.25,000, நிப்பான் ஸ்மால்கேப் ஃபண்டில் ரூ.25,000 எஸ்.ஐ.பி முறையில் மாதம்தோறும் முதலீடு செய்கிறேன். நான் அதிகபட்ச ரிஸ்க் எடுக்கவும் தயாராக இருக்கிறேன்.
– ராஜேஷ், குவைத்
“அதிக ரிஸ்க் எடுப்பதில் தவறில்லை. அதே வேளை, உங்கள் போர்ட்ஃபோலியோவை எவ்வாறு பராமரிக்கிறீர்கள் என்பதைப் பொறுத்து இருக்கிறது. உதாரணமாக, 2008-ல் மிட் மற்றும் ஸ்மால்கேப் சராசரியாக 55 – 70% வரை சரிவு கண்டது. அத்துடன் சமீபத்திய மார்க்கெட் சரிவின்போது அதிக வீழ்ச்சியைக் கண்டது. இப்படிப்பட்ட காலகட்டத்தில் உங்களுடைய அணுகுமுறைதான் உங்களுடைய வருமானத்தை நிர்ணயம் செய்யும். சராசரியாக முதலீட்டாளர்கள் அதிக ரிஸ்க் எடுப்பதற்குத் தயாராக இருப்பார்கள். ஆனால், 20 – 30% மார்க்கெட் வீழ்ச்சி கண்டவுடன் அவர்களின் செயல்பாடு முற்றிலும் மாறுபடும். எனவே, அதிக ரிஸ்க் எடுத்தாலும் 60 – 70 சதவிகிதத்துக்கு மேல் போர்ட்ஃபோலியோவில் மிட் மற்றும் ஸ்மால்கேப் இல்லாமல் பார்த்துக்கொள்வது போர்ட்ஃபோலியோவின் ஸ்திரத் தன்மையை அதிகரிக்கும்.
எஸ்.பி.ஐ ஸ்மால்கேப், நிப்பான் இந்தியா ஸ்மால்கேப், பி.என்.பி பரிபாஸ் மிட்கேப், இன்வெஸ்கோ இந்தியா மிட்கேப், மிரே அஸெட் எமெர்ஜிங் புளூசிப், கனரா ராபிகோ எமெர்ஜிங் ஈக்விட்டி, மோதிலால் ஆஸ்வால் ஃபோகஸ்டு 25, மிரே அஸெட் லார்ஜ்கேப் போன்ற ஃபண்டுகளில் 70:30% முதலீடு செய்யவும். மற்ற ஃபண்டுகளை விற்றுவிடவும்.”
என் வயது 60. மிரே அஸெட் லார்ஜ்கேப் ஃபண்ட் ரூ.3 லட்சம், ஆக்ஸிஸ் குரோத் ஆப்பர்ச்சூனிட்டீஸ் ஃபண்ட் ரூ.2.5 லட்சம், எல் அண்ட் டி ஃபோக்கஸ்டு ஃபண்ட் ரூ.1.5 லட்சம், மிரே அஸெட் எமெர்ஜிங் புளூசிப் ரூ.1 லட்சம் என மொத்த முதலீடுகளைச் செய்துள்ளேன். தவிர ஃபிக்ஸட் டெபாசிட்டில் ரூ.35 லட்சம், பங்குகளில் ரூ.9 லட்சம் முதலீடு செய்துள்ளேன். என் முதலீடுகள் சரியா?
– ராமு ஸ்ரீதர், மெயில் மூலமாக
“உங்கள் முதலீட்டில் 32% பங்கு சார்ந்தும் மீதம் டெபாசிட்டிலும் உள்ளது. இது ஓய்வு பெற்றவருக்கு சரியானதுதான். பங்குகளில் உள்ள முதலீடு இந்தியாவிலுள்ள டாப் 100 கம்பெனிகளாக இருந்தால் பரவாயில்லை. அதை விடுத்து அதிக ஸ்மால்கேப் பங்குகளில் முதலீடு செய்திருந்தால் மார்க்கெட் ஏற்றத்தில் போர்ட்ஃபோலியோவை மாற்றியமைக்கவும்.
உங்கள் மியூச்சுவல் ஃபண்ட் முதலீட்டை அப்படியே தொடரவும். எல் அண்ட் டி ஃபோகஸ்டு ஈக்விட்டி ஃபண்டைக் கண்காணித்து வரவும். மூன்று அல்லது நான்கு காலாண்டு் செயல்பாட்டில் தொய்விருந்தால் மாற்றம் செய்யவும். மீதமுள்ள முதலீட்டை அப்படியே தொடரவும்.”
என் வயது 46. என் மனைவியின் வயது 40. இருவரும் சில ஃபண்டுகளில் எஸ்.ஐ.பி முறையில் மாதம்தோறும் 10 மற்றும் 12 வயது ஆகும் என் குழந்தைகளின் கல்வி, திருமணம் ஆகியவற்றுக்காகவும் ஓய்வுக்காலத்துக்காகவும் முதலீடு செய்து வருகிறோம். எங்கள் இலக்கு 15 ஆண்டுகளில் ரூ.3 கோடி சேர்க்க வேண்டும் என்பதே.
என்னுடைய முதலீடுகள்… ஆதித்ய பிர்லா ஹைபிரிட் ஃபண்ட் 95 ஃபண்ட் – ரூ.5,000, ஆதித்ய பிர்லா டாக்ஸ் 96 ஃபண்ட் – ரூ.5,000, ஆக்ஸிஸ் புளூசிப் ஃபண்ட் – ரூ.10,000, ஆக்ஸிஸ் ஃபோகஸ்டு ஃபண்ட் 25 ஃபண்ட்- ரூ.5,000, ஆக்ஸிஸ் ஸ்மால்கேப் ஃபண்ட் – ரூ.5,000, ஹெச்.டி.எஃப்.சி ஹைபிரிட் ஈக்விட்டி – ரூ.3,000, கோட்டக் ஸ்டாண்டர்டு மல்ட்டிகேப் ஃபண்ட் – ரூ.3,000, எல் & டி எமெர்ஜிங் பிசினஸ் – ரூ.6,000, மிரே அஸெட் மல்ட்டிகேப் ஃபண்ட் – ரூ.3,000, மோதிலால் மல்ட்டிகேப் 35 ஃபண்ட் – ரூ.3,000, நிப்பான் ஸ்மால்கேப் ஃபண்ட் – ரூ.3,000, பிரின்சிபல் எமெர்ஜிங் புளூசிப் ஃபண்ட் – ரூ.6,000.
என்னுடைய போர்ட்ஃபோலியோவில் ஏதேனும் மாற்றங்கள் தேவையா..?
– தாமோதரன், மெயில் மூலமாக
“மாதம் ரூ.57,000 முதலீடு செய்து, அதில் 12% வருமானம் வந்தால், நீங்கள் ரூ.2.84 கோடி இலக்கை அடைய இயலும். அதேவேளையில் மார்க்கெட் உச்சத்தில் இருக்கும்போதோ, உங்கள் போர்ட்ஃபோலியோ 17 முதல் 20 சதவிகிதத்துக்கு மேலாக வருமானம் கொடுத்திருந்தாலோ போர்ட்ஃபோலியோவில் 20 – 30% பிராஃபிட் புக் செய்தால் இந்த முதலீட்டை வைத்து உங்கள் இலக்கான ரூ.3 கோடியை அடைய இயலும்.
உங்கள் முதலீட்டில் உள்ள ஹெச்.டி..எஃப்.சி ஹைபிரிட் மற்றும் எல் அண்ட் டி எமெர்ஜிங் பிசினஸ் ஃபண்டுகளை நிறுத்திவிட்டு, அவற்றுக்குப் பதிலாக மோதிலால் ஆஸ்வால் ஈக்விட்டி ஹைபிரிட் ஃபண்டிலும், யூ.டி.ஐ ஈக்விட்டி ஃபண்டிலும் முதலீடு செய்யவும்.”
உங்கள் ஃபண்ட் போர்ட்ஃபோலியோவை மாற்றியமைக்க வேண்டுமா? finplan@vikatan.com என்ற மெயில் முகவரிக்கு நீங்கள் முதலீடு செய்யும் ஃபண்டுகள் குறித்த விவரங்களை அனுப்பவும்.
THIS ARTICLE WAS PUBLISHED IN NANAYAM VIKATAN ON 30.08.2020 WRITTEN BY MR.SURESH PARTHASARATHY.