25 – 35 வயது மில்லினியலா நீங்கள்..? உங்களைப் பணக்காரர் ஆக்கும் 5 நிதிப் பாடங்கள்!

மில்லினியல்ஸ் (Millennials) என 1980-களின் ஆரம்பத்தில் தொடங்கி, 1990-களின் கடைசி வரையிலும் பிறந்தவர்கள் அழைக்கப்படுகிறார்கள். அனைத்து துறைகளிலும் இவர்கள் சிறப்பாகச் செயல்படுகின்றனர். இந்த இளைஞர்கள் இன்று லட்சக் கணக்கில் சம்பாதிக்கின்றனர். ஆயிரக்கணக்கான இளைஞர்கள் சுயதொழிலில் ஈடுபடுகின்றனர். இவர்கள் புத்திசாலித் தனமாக சம்பாதித்தாலும் அதைச் சேமித்து வைப்பதிலும், முதலீடு செய்வதிலும் கோட்டை விட்டுவிடுகின்றனர் என்பது நிதி ஆலோசகர்களின் பெரும் கவலையாக மாறியிருக்கிறது.

தங்களின் நிதி வாழ்க்கையை வளமாக்கிக் கொண்டு, எளிதில் கோடீஸ்வரர் ஆக மில்லினியல்கள் கற்றுக் கொள்ள வேண்டிய 5 முக்கிய நிதிப் பாடங்கள் பற்றியும், அவர்கள் மாற்றிக்கொள்ள வேண்டிய ஃபைனான்ஷியல் பழக்க வழக்கங்கள் என்னென்ன என்பது பற்றியும் நிதி ஆலோசகர்கள் சிலரிடம் பேசினோம்.

1. செலவைக் கட்டுக்குள் வையுங்கள்!

முதலில் நிதி ஆலோசகர் லலிதா ஜெயபாலனுடன் பேசினோம். “நான் மில்லினியல்களை ‘ஆப் ஜெனரேஷன்’ என்று அழைப்பேன். ஏனெனில், அவர்களின் மொத்த உலகமுமே ஆப்ளிகேஷனுக்குள் அடங்கிவிட்டது. ஏதாவது ஒரு பொருளை ஷாப்பிங் செய்வதாக இருந்தாலும் அவர்கள் முதலில் அணுகுவது ஆப்ளிகேஷனைத்தான். ஷாப்பிங் ஆப்களால் இவர்கள் அதிக அளவு நுகர்வுக்கு உந்தப்படுகிறார்கள்.

ஓர் இடத்தில், அது ஆஃப்லைனாக இருந்தாலும் சரி, ஆன்லைனாக இருந்தாலும் சரி ‘ஆஃபர்’ என்கிற போர்டை பார்த்து விட்டால், அந்தப் பொருளுக்கான அவசியம் இருக்கிறதோ இல்லையோ, அதை வாங்கிவிட வேண்டும் என்று முடிவெடுக்கிறார்கள். கையில் காசு இல்லை என்றாலும், இ.எம்.ஐ ஆப்ஷனைப் பயன்படுத்தி அந்தப் பொருளை வாங்கிவிடுகிறார்கள். ஸ்மார்ட் போனுக்குள் அவர்கள் ஸ்மார்ட்டாகச் செயல்படுவது போல, செலவு செய்வதிலும் அவர்கள் ஸ்மார்ட்டாக இருக்க வேண்டும்.

மேலும், பணத்தின் அருமை தெரியாமல் தாறுமாறாகச் செலவழிக்கும் சமுதாய மாகத்தான் இன்றைய இளைய சமுதாயம் இருக்கிறது. அவசியம் எது, தேவை எது என்பது தெரியாமல் இளம் வயதில் பார்ப்பதை எல்லாம் வாங்குகிறார்கள். தேவை எதுவோ, அதுவே அவசியம் என நினைக்கிறார்கள். தனது அத்தியா வசியத் தேவை எது என்பதைத் தீர்மானிப்பதில்தான் ஓர் இளைஞனின் வெற்றி அடங்கியிருக்கிறது.

ஆப் வாலட்டுகளில் பணம் போட்டு வைத்து அதன் மூலம் ஷாப்பிங் செய்யும்போது 5% கேஷ்பேக் என்கிற ஆப்ஷன் இருப்பதால், அதிகமான தொகையை இளைஞர்கள் அதில் போட்டு வைக்கிறார்கள். இந்தப் பழக்கத்தை உடனடியாக அவர்கள் கைவிட வேண்டும்.

முதல் செலவு சேமிப்பாக இருக்க வேண்டும் என்பது ஃபைனான்ஷியல் நியதி. ஆனால், மில்லியனல்களுக்கு நான் சொல்லும் ஃபார்முலா ‘முதல் செலவு, கடனை அடைப்பதற் காக இருக்க வேண்டும்’ என்பதுதான். குறிப்பாக, கல்விக் கடனில் படித்து முடித்துவிட்டு வேலைக்குச் சேர்ந்து சம்பாதிப்பவர்கள், அதற்காகப் பெரும் தொகையை ஒதுக்கி 3 – 5 ஆண்டுகளில் அந்தக் கல்விக் கடனை முடித்துவிட வேண்டும். அப்போதுதான் எதிர்காலத்தில் முதலீட்டுக்காக, சேமிப்புக்காகப் பெரும் தொகையை ஒதுக்க முடியும்.

2. இன்ஷூரன்ஸ் முக்கியம் பிகிலு!

“இன்றைய இளைஞர்களின் பலர் இன்ஷூரன்ஸை ஒரு முதலீடாகப் பார்க்கும் பழக்கம் கொண்டவர்களாக இருக்கிறார்கள். இன்ஷூரன்ஸ் என்பது முதலீடு கிடையாது. அது ஒரு பாதுகாப்புக்கான அம்சம். தேவை இருக்கிறதோ இல்லையோ வரிச் சலுகை பெறுவதற்காக இன்ஷூரன்ஸ் எடுக்கும் இளைஞர்கள் கூட்டம் இன்றும் இருக்கத்தான் செய்கிறது. ஒவ்வொரு நிதி ஆண்டின் இறுதிகளில், ஐ.டி நிறுவன வளாகத்துக்குள் இன்ஷூரன்ஸ் நிறுவனங்கள் ஸ்டால்களை அமைத்து ஐ.டி ஊழியர்களுக்காக இன்ஷூ ரன்ஸ்களை வழங்குவதும் இன்னும் நடக்கிறது.

இன்ஷூரன்ஸை வரிச் சலுகைக்கு காண்பிப்பது என்பது ஒரு ஆப்ஷன்தான். வரிச் சலுகை பெற வெவ்வேறு முதலீட்டு ஆப்ஷன்கள் இருக்கின்றன. அதைத் தெரிந்துகொண்டால் தேவையான அளவுக்கு, தேவையான இன்ஷூரன்ஸை மட்டும் எடுத்துக்கொள்ளலாம். அந்த வகையில் ஒருவருக்கு டேர்ம் மற்றும் மெடிக்கல் இன்ஷூரன்ஸ் இருந்தால் மட்டுமே போதுமானது. இந்த இன்ஷூரன்ஸ்களுக்கும் வரிச் சலுகை உண்டு.

பெரும்பாலான நிறுவனங் களில் குரூப் மெடிக்கல் பாலிசி கள் எடுத்திருப்பார்கள். அதில் தங்கள் மனைவி மற்றும் குழந்தைகளின் பெயர்களைத் தான் பெரும்பாலான இளைஞர் கள் இணைப்பார்கள். அப்படிச் செய்யாமல் பெற்றோர்களின் பெயர்களை அதில் இணைத்துக் கொண்டு, மனைவி மற்றும் குழந்தைகளுக்காக வெளியில் தனியாக மெடிக்கல் பாலிசிகளை எடுப்பது நல்லது. ஏனெனில், குரூப் பாலிசிகளில் வயதானவர் களுக்கான மருத்துவ வசதிகள் அதிகமாகவும் பிரீமியம் குறை வாகவும் இருக்கும்.

அதேபோல, ‘எம்ப்ளாயர் டேர்ம் இன்ஷூரன்ஸ்’ என்கிற ஆப்ஷனையும் பெரும்பாலான கார்பரேட் நிறுவனங்கள் ஏற்படுத்தி வைத்திருக்கின்றன. அந்த மாதிரியான இன்ஷூரன்ஸ் இருப்பவர்கள், அந்த பாலிசிக்கு மிகக் குறைந்த பிரீமியம் தான் செலுத்த வேண்டி யிருக்கும். முதலீடுகளை ஆரம்பிக் கும்முன் டேர்ம் மற்றும் மெடிக்கல் பாலிசிகளை எடுத்து வைத்திருக்க வேண்டும்’’ என்றார் லலிதா ஜெயபாலன்.

3. கடன் நல்லதுதான். ஆனால்..!

கடன், முதலீடு மற்றும் அவசரகால நிதி விஷயங்களில் மில்லினியல்கள் கற்றுக்கொள்ள வேண்டிய நிதிப் பாடங்கள் என்ன என்பதைப் பற்றி விளக்கினார் நிதி ஆலோசகர் சுரேஷ் பார்த்தசாரதி.

‘கடன்பட்டார் நெஞ்சம் போல் கலங்கினான் இலங்கை வேந்தன்’ என்ற பழைய தமிழ் பழமொழி பலருக்கு மறந்துவிட்டது. இன்றைய காலத்தில் கடன் இல்லை என்றால் வாழ்க்கையின் அடுத்தகட்டம் இல்லை என்று சொல்லும் நிலையில் வாழ்ந்துகொண்டிருக்கிறோம். கடன் வாங்குவது நல்லதுதான். ஆனால், கடனே வாழ்க்கை ஆகிவிடக் கூடாது. எது நல்ல கடன், எது கெட்ட கடன் என்பதை இன்றைய இளைஞர்கள் முதலில் புரிந்துகொள்ள வேண்டும்.

கடனால்தான் எல்லாவற்றையும் நிறைவேற்றிக் கொள்ள முடியும் என நினைத்து இ.எம்.ஐ கமிட்மென்ட்டு களுக்குள் சிக்குவதை இன்றைய இளைஞர்கள் ஒரு பழக்கமாகவே வைத்திருக்கிறார்கள். இதனால் சம்பளத்தில் பெரும்பகுதி இ.எம்.ஐ-க்கு ஒதுக்கவே சரியாக இருக்கிறது. இந்த விஷயத்தை அவர்கள் உடனடியாக மாற்றிக்கொள்ள வேண்டும். நாம் எவ்வளவு கடன் வாங்க வேண்டும், எவ்வளவு நாம் சேர்த்து வைத்தால் கடன் வாங்குவதை குறைப்பதற்கு ஏதுவாக இருக்கும் என்பதையும் இன்றைய இளைஞர்கள் தெரிந்து வைத்திருப்பது அவசியம்.

கடன் வாங்குவதற்கு முன், அவசியம் எது, தேவை எது என்பதைப் பிரித்துப் பார்த்து கடன் வாங்கினால் வாழ்க்கையில் பல நேரங்களில் கடன் பிரச்னையிலிருந்து விடுபடலாம். வீட்டுக் கடன், கார் கடன் என எத்தனை கடன் வாங்கினாலும், மொத்த வருமானத்தில் 40 – 50 சதவிகிதத்துக்கு மேல் மாதத் தவணை இருக்கக் கூடாது. ரூ.25 லட்சத்துக்கு வீட்டுக் கடன் வாங்கினால், மாதத் தவணையாக சுமார் ரூ.25,000 – ரூ.30,000 வரை கட்ட வேண்டி வரும். அப்படிப்பட்ட சூழலில், மாதத் தவணை கட்டியது போக செலவுக்குப் போதிய பணம் இருக்கும்படி பார்த்துக் கொள்ளுங்கள். கடன் இ.எம்.ஐ-க்கான தொகை இந்த சதவிகிதத்துக்குள் இருந்தால்தான் எதிர்காலத் தேவைகளுக்கு எவ்வளவு முதலீடு செய்ய வேண்டும் என்ற இலக்கை நிர்ணயிக்க முடியும். சம்பளத்தில் பெரும்பகுதி கடன் கட்டவே சரியாக இருந்தால், சேமிப்புக்கு, முதலீட்டுக்கு எனத் தனியாகத் தொகையை ஒதுக்க முடியாமல் போய்விடும்.

லாபகரமான முறையில் பயன்படுத்தத் தெரிந்தவர்களுக்கு கிரெடிட் கார்டு நல்லதுதான். ஆனால், கிரெடிட் கார்டுகளை வாங்கி அதைப் பயன்படுத்தத் தெரியாமல் காசை கரியாக்கும் இளைஞர்கள்தான் இன்று அதிகம். அதனால் கிரெடிட் கார்டு விஷயங்களை முழுமையாகப் புரிந்துகொண்டு அதை முறையாகக் கையாளத் தெரிந்தவர்கள் மட்டுமே அதைப் பயன்படுத்துவது நல்லது.

கிரெடிட் கார்டின் சிறிய கடனைக்கூட சரியான நேரத்தில் கட்டவில்லை எனில், வட்டி, அபராதம், வட்டிக்கு வட்டி என உங்களைப் பெரிய கடனாளியாக்கி விடவும் வாய்ப்பு அதிகம். கடனில் பொருள்கள் வாங்குவது, உங்களை மேலும் மேலும் கடனாளியாக்கும். வீடு வாங்குவது, கார் வாங்குவது என எல்லா விஷயங்களும் கடனிலேயே இருந்தால், நிச்சயம் கடைசி வரை கடன்காரனாகவே இருக்க நேரிடும்.

4. முதலீடுதானே எல்லாம்!

சம்பாதித்தும் பல இளைஞர்கள் ஏழைகளாகவே இருக்கின்றனர். நிதி நிலையைக் கையாள்வதில் ஏற்படும் கோளாறே இளைஞர்களைப் பணக்கார ஏழைகளாக மாற்றிவிடுகிறது. முதலீடு சார்ந்த தற்போதைய ஒரு சில தவறுகளை இளைஞர்கள் சரிசெய்தால் நிதி நிலையைக் கையாள்வதில் அவர்களை அது திறமைசாலி ஆக்கிவிடும். நிதியைக் கையாள் வதை மட்டும் மில்லியனல்கள் கற்றுக்கொண்டு விட்டால், இந்த உலகத்தில் அவர்களை யாராலும் அசைக்க முடியாது.

இன்றைய நிலையில் இளைஞர்கள் தங்கள் வரு மானத்தில் 60 சதவிகிதத்துக்கும் அதிகமாகச் செலவழிக்கிறார்கள். அப்படி எனில், சேமிப்பு மற்றும் முதலீட்டுப் பழக்கம் குறைந்து விட்டது என்றுதானே அர்த்தம். சம்பாதிக்கும் பணத்தை சரியாக முதலீடு செய்யும் வழக்கம் இல்லையென்றால், வாழ்க்கை யில் வெற்றி பெற முடியாது. சிறிய வயதிலேயே முதலீட்டின் பயனை அறிந்துகொண்டால், வருங்காலத்தில் நிம்மதியாக இருக்கலாம்.

அதனால் மில்லினியல்கள் இந்த நொடியில் இருந்தே முதலீட்டுக்கான சிந்தனைகளை வளர்த்துக்கொண்டு, எதில் எவ்வளவு முதலீடு செய்யலாம் என்கிற நடைமுறைக்குள் இறங்க வேண்டும். அப்படி, முதலீட்டை மேற்கொள்ளும்போது அதை தேவைக்கு ஏற்ப பிரித்து முதலீடு செய்வது, நீண்ட கால அடிப் படையில் நல்ல வருமானத்தைக் கொடுக்கும். 25 வயதில் சம்பாதிக்க ஆரம்பிக்கும் இளைஞர்கள், சம்பளத்தில் ஒரு பகுதியை முதல் மாத சம்பளத்தில் இருந்தே மியூச்சுவல் ஃபண்டு களில் எஸ்.ஐ.பி முறையில் முதலீடு செய்து வரலாம்.

திருமணம், குழந்தைகள் என்கிற கமிட்மென்ட்களுக்குள் இருக்கும் இளைஞர்கள் குழந்தைகளின் கல்வி, அவர்களின் திருமணம் மற்றும் தங்களின் ஓய்வுக்காலம் எனத் தேவைகளுக்கு ஏற்ப பிரித்து முதலீடு செய்யும்போது கால நிர்ணயத்தின்படி, அந்தந்தத் தேவைகளுக்காகப் பணத்தை நிச்சயமாகப் பெற முடியும். சம்பாதிக்கும் காலம் வரை முதலீடு செய்து வந்தால் ஓய்வுக்காலத்தில் யாருக்கும் தொந்தரவு இல்லாமல் நம் பணத்தை வைத்துக்கொண்டு நிம்மதியாக வாழலாம்.

உதாரணத்துக்கு, இன்னும் 10 ஆண்டுகளில் குழந்தை மேற்படிப்புக்குச் செல்ல வேண்டு மெனில், அதற்கு இன்றைய காலகட்டத்தில் ரூ.10 லட்சம் தேவையெனில், 7% பணவீக்கம் அடிப்படையில் கணக்கிட்டால் 10 ஆண்டுகள் கழித்து குழந்தையின் மேற்படிப்புக்கு ரூ.19.7 லட்சம் தேவைப்படும். அதற்காக ஒருவர் மாதம் ஒன்றுக்கு ரூ.8,550 முதலீடு செய்து வந்து, அதற்கு 12% வருமானம் கிடைத்தால் அந்த இலக்கை இலகுவாக அடையலாம்.

இப்படி ஒவ்வொரு தேவைக்காக முதலீட்டை மேற்கொண்டு, அதை ஒவ்வோர் ஆண்டும் மறு பரிசீலனை செய்து வர வேண்டும். குறைந்த வயதுள்ளவர்களுக்கு ரிஸ்க் எடுக்கும் தன்மை அதிகமாக இருக்கும். அதனால் மியூச்சுவல் ஃபண்ட் மற்றும் பங்குச் சந்தையில் மொத்த முதலீட்டுத் தொகையில் 50% தொகையை முதலீடு செய்யலாம். 25 – 35% தொகையைக் கடன் மற்றும் கடன் சார்ந்த பாண்டுகளிலும், 5 – 10% வரை தங்கம் மற்றும் ரியல் எஸ்டேட்டில் முதலீடு செய்யலாம்.

5. அவசரகால நிதி…

இன்றைய நிலையில், பல புதிய நோய்கள் பரவி வருவதால், மருத்துவச் செலவுகள் அதிகரித்து வருகின்றன. அதேவேளையில், வேலை இழக்கும் சாத்தியக்கூறுகளும் அதிகம்தான். எனவே, குடும்பத்துக்குத் தேவைப்படும் ஆறு மாத செலவுத் தொகையைத் தனியாக அவசரகால சேமிப்பாக வைத்திருப்பது நல்லது. இதனுடன் மாதம் 5,000 ரூபாயை மருத்துவச் செலவுகளுக்காகத் தனியாக லிக்விட் சேமிப்பாக வங்கிகளில் சேமித்து வருவது நல்லது.

அவசரகால நிதி குறித்த விழிப்புணர்வு, 30 வயதுக்கு கீழ் இருப்பவர்களைவிட, 30 வயதைக் கடந்தவர்களுக்கு சற்று அதிகமாக இருக்கிறது. அதனால் அவர்கள், வருமானத்தில் ஒரு பகுதியை அவசரகால நிதிக்காக ஒதுக்கு கிறார்கள். 30 வயதைக் கடந்தும் ஒருவருக்கு அவசரகால நிதி சேமிப்பு குறித்து யோசிக்கவில்லை எனில், அதைவிட மோசமான விஷயம் இல்லை. அவசரகாலத் தேவைகளுக்கு கைமாத்து வாங்கிச் சமாளிக்கலாம் என யோசிக்காமல், இப்போதிலிருந்தே அதற்கான சேமிப்பை ஆரம்பியுங்கள்” என்றார் தெளிவாக.

ஆக, இந்த விஷயங்களையும் மில்லினியல்கள் கடைப்பிடிக்க ஆரம்பித்தால் நிச்சயம் பில்லினியர் ஆகலாம்!

பங்குச் சந்தைக்குள் படையெடுக்கும் இளைஞர்கள்!

“இன்றைய நிலையில் குறிப்பாக, கொரோனா தொற்றுக்குப் பிறகான காலகட்டத்தில் பங்குச் சந்தை மற்றும் மியூச்சுவல் ஃபண்டுகளில் 25-35 வயதுள்ள இளைஞர்கள் அதிக அளவில் முதலீடு செய்ய ஆரம்பித்திருக்கிறார்கள். ஆனால், அது பற்றி முழுமையாகத் தெரிந்துகொள்ளாமல் ஆரம்பிப்பது ஆபத் தானது. கடலில் ஆழம் தெரியாமல் காலை விட்டால் என்ன ஆகுமோ, அப்படித் தான் முதலீடு குறித்த விஷயங்களைத் தெரிந்துகொள்ளாமல் முதலீடு செய்வதும்.

இன்றைய நிலையில் அனைத்துக்கும் வாட்ஸ்அப் குரூப் இருப்பதுபோல, முதலீட்டுப் பரிந்துரை மற்றும் அதுபற்றிய ஆலோசனைகளுக்கும் ஃபேஸ்புக், ட்விட்டரில் ஃபோரம் கிரியேட் செய்து, அதில் முதலீடு பற்றி உரையாடுகிறார்கள். ஒரு நண்பர் ஒரு முதலீட்டில் முதலீடு செய்திருக்கிறார் என்றால், அப்படியே அந்த முதலீட்டை நம்பி முதலீடு செய்ய வேண்டாம்.

எந்தத் திட்டத்தில் முதலீடு செய்ய வேண்டும் என்பது குறித்த தெளிவான அறிவு முதலில் முதலீடு செய்பவர்களுக்கு இருக்க வேண்டும். நீங்கள் முதலீடு செய்யும் திட்டம் குறித்து முழு அறிவைப் பெற்றிருக்க வேண்டும். அதன் வருமானம், ரிஸ்க், பணமாக்கும் விதம், வருமான வரி போன்றவற்றை அறிந்துகொள்வது அவசியம்.

அதேபோல, மில்லினியல்கள் ரிஸ்க் எடுப்பதிலும் கூடுதல் கவனம் செலுத்த வேண்டும். ஒரு முதலீட்டைத் தேர்வு செய்கையில், எந்த அளவுக்கு இழப்பீட்டைத் தாங்கிக்கொள்ள முடியும் என்பதை சரியாகக் கணிக்கத் தெரிந்திருக்க வேண்டும். வருமானம், குடும்பச் சூழல் போன்றவற்றைப் பொறுத்தே ரிஸ்க் அளவு இருக்க வேண்டும்.

அதுபோல தெளிவான நிதித் திட்டம் இருந்தால்தான், பணத்தை இழந்தாலும் உங்களால் தாங்கிக்கொள்ள முடியும். எப்போது அந்த முதலீட்டிலிருந்து வெளியேறுவது என்பதும் தெளிவாகத் தெரிந்திருக்க வேண்டும். முதலில் ரிஸ்க் அதிகமுள்ள பங்குச் சந்தை முதலீடுகளில் இறங்காமல், ரிஸ்க் குறைவான மியூச்சுவல் ஃபண்ட் முதலீட்டை எஸ்.ஐ.பி (சிஸ்டமேட்டிக் இன்வெஸ்ட்மென்ட் பிளான்) முறையில் மாதாமாதம் ஒரு தொகையை முதலீடு செய்து வருவது நல்லது” என்று தெளிவாக விளக்கினார் முதலீட்டு ஆலோசகர் ரெஜிதாமஸ்.

உதாரணம்: எஸ்.ஐ.பி முறையில் மாதம் ரூ.5,000 முதலீடு செய்தால், ஆண்டுக்கு 15% வருமானம் கிடைத்தால்கூட, 25 ஆண்டுகளில் அது கிட்டத்தட்ட ரூ.1.6 கோடியாக அதிகரித்திருக்கும். அதாவது, சம்பாதிக்கத் தொடங்கும் 23 முதல் 25 வயதிலிருந்து நீங்கள் மாதம் ரூ.5,000 முதலீடு செய்தால், உங்களது 50-வது வயதில் கிட்டத்தட்ட ரூ.1.5 கோடிக்கு நீங்கள் அதிபதி.

இன்ஃபார்மல் கடன்கள் வேண்டாம்!

“தன் மகனோ, மகளோ வெளிநாடுகளில் படிப்பதற்காகக் கந்துவட்டிக்கு காசு வாங்கி, அதை வைத்து படிக்க அனுப்பும் நிறைய பெற்றோர்களை நான் பார்த்திருக்கிறேன். அந்த இளைஞர்கள் படித்து முடித்து வேலைக்குப் போகும்போது, அந்தக் கடன் சுமையைத் தாங்களே சுமக்கும் நிலைக்கும் அவர்கள் தள்ளப்படுகிறார்கள். பெற்றோர்கள் தெரிந்தும், தெரியாமலும் வாங்கிய கந்துவட்டி மாதிரியான இன்ஃபார்மல் கடன்களைக் கட்டி முடிப்பதற்குள் அவர்களுக்கு போதும்போதும் என்றாகிவிடுகிறது. எந்தத் தேவையாக இருந்தாலும் கந்துவட்டி கடன்களை மட்டும் வாங்க வேண்டாம். குறிப்பாக, கல்வித் தேவைகளுக்காகக் கந்துவட்டி கடன்களை வாங்க வேண்டாம். அது தங்கள் பிள்ளைகளின் பொருளாதார வாழ்க்கையை சீரழித்துவிடும் என்பதைப் பெற்றோர்கள் முதலில் உணர்வது அவசியம்” என்றார் லலிதா ஜெயபாலன்.

THIS ARTICLE WAS PUBLISHED IN NANAYAM VIKATAN ON 12.02.2022 WRITTEN BY MR.SURESH PARTHASARATHY.