20 ஆண்டு ஸ்மார்ட் பிளான்… 45 வயதிலேயே ஓய்வு… உன்னத வாழ்க்கைக்கு உத்தரவாதம்!

முன்பெல்லாம் இளைஞர் களிடம் ‘ஓய்வுக் காலத்துக்கு முதலீடு செய்யத் தொடங்கி விட்டீர்களா…’ என்று கேட்டால், ‘‘இப்போது என்ன அவசரம்..?’’ என்று கேட் பார்கள். ஆனால், இன்று ஓய்வுக்காலத்துக்காக முதலீடு செய்வதில் ஆர்வத்துடன் செயல்படத் தொடங்கியிருக்கிறார்கள். பெரும்பாலானோர் சீக்கிரமே வேலையிலிருந்து ஓய்வு பெற்று, வாழ்க்கையை விரும்புகிற மாதிரி ரசித்து வாழ வேண்டும் என்கிற கனவுடன் இருக்கிறார்கள்.

இளைஞர்களின் கனவுகள்…

உலகமெல்லாம் சுற்றிப் பார்க்க வேண்டும், சமூக சேவை செய்ய வேண்டும், தொழில் முனைவோர் ஆக வேண்டும், கிராமத்துக்குத் திரும்பி இயற்கை விவசாயம் செய்ய வேண்டும் இப்படி எவ்வளவோ கனவுகளுடன் இன்றைய இளைஞர்கள் இருக்கிறார்கள்.

காரணம், இன்றைய பரபரப்பான சூழலில் காலையில் அவசர அவசரமாக அலுவலகம் கிளம்பி, அடித்துப் பிடித்துச் செல்லும் கடும் டிராஃபிக் நெருக்கடியில் நசுங்கி நொந்துபோய் அலுவலகத்துக்குச் செல்லும் பெரும்பாலா னோருக்கு ‘‘நாம் இந்த வாழ்க்கையைச் சரியாகத்தான் வாழ்கிறோமா, இப்படி ஓடிக் கொண்டே இருக்கிறோமே, என்ன சாதித்தோம், எப்போதுதான் இந்த வாழ்க்கையை ரசித்து வாழப் போகிறோம்?’’ என்ற கேள்வி எழுகிறது.

அதே சமயம், பிடித்தமான வேலை எல்லோருக்குமே உடனே கிடைத்துவிடுவ தில்லை. அப்படியே பிடித்த வேலையாக இருந்தாலும், அலுவலகச் சூழல் நமக்குப் பிடித்த மாதிரி அமையாது. இதுபோன்ற பல காரணங்களால் வேலை சார்ந்த அழுத்தத்துக்கு உள்ளாகிறார்கள். என்றாலும், நமக்கும் நம்மை சார்ந்தவர்களுக்கும் சேர்த்து பொருளீட்ட வேண்டிய பொறுப்பு எல்லோருக்கும் இருக்கவே செய்கிறது.

இந்தப் பொறுப்பை நாம் தட்டிக்கழித்து விட முடியாது. அதற்காகவாவது வேலைக்குப் போய்த்தான் தீர வேண்டும் என்ற கட்டாயம் எல்லோருக்கும் உண்டு. அதே சமயம், சீக்கிரம் வேலையிலிருந்து ஓய்வு பெற வேண்டும், ஓய்வுக்காலத்தில் பொருளாதாரம் குறித்த எந்த அச்சமும் இல்லாமல், மகிழ்ச்சியாக வாழ வேண்டும் என்கிற ஆசை எல்லோருக்கும் உண்டு.

குடும்பப் பொறுப்புகளையும் தட்டிக் கழிக்காமல் நமக்கான வாழ்க்கையையும் நாம் மகிழ்ச்சியாக வாழ வழி இருக்கிறதா?

ஸ்மார்ட்டாகத் திட்டமிடுங்கள்…

நிச்சயம் இருக்கிறது; ஸ்மார்ட்டாகத் திட்டமிட்டால் நாம் விரும்புகிறபடி, இந்த வாழ்க்கையை ரசித்து வாழ முடியும். எப்படி?

இருபது ஆண்டுகள்… இருபதே ஆண்டுகள் நிதி திட்டமிடலை ஒழுங் காகக் கடைப்பிடித்தால், 45 வயதில் வேலையிலிருந்து ஓய்வு பெற்றுவிட்டு நினைத்த வாழ்க்கையை வாழலாம். இன்றைய சேமிப்பு, நாளைய வளமான வாழ்க்கைக்கு அடிப்படை. இளமையில் சம்பாதிக்கும் பணத்தைச் சேர்த்தால், முதுமையில் வளமாக வாழலாம். இதற்குத் தேவை குறையற்ற திட்டமிடல்.

செல்வத்தைப் பெருக்குவதில் காலத்துக்கு முக்கியப் பங்கு உண்டு. காலம் என்பது வயதைக் குறிப்பதல்ல. எந்த வயதில் இருந்தாலும் குறிப்பிட்ட காலத்தில் நம்முடைய இலக்குகளை நம்மால் எட்டிவிட முடியும். அதுதான் முதலீட்டில் உள்ள சுவாரஸ்யம். ஆனால், எவ்வளவு இளம்வயதில் முதலீட்டைத் தொடங்குகிறோமோ, அவ்வளவு எளிதாக நிதி இலக்குகளை எட்டலாம்.

சீக்கிரம் ஓய்வு பெற எப்படி ஸ்மார்ட்டாகத் திட்டமிட்டு முதலீடு செய்வது என்கிற கேள்வியை நிதி ஆலோசகர் சுரேஷ் பார்த்தசாரதியிடம் கேட்டோம். 25 வயதில் தொடங்கி 20 ஆண்டுகள் ஸ்மார்ட்டாக பிளான் செய்து எப்படி ஓய்வு பெறுவதற்கான கார்ப்பஸ் தொகையைத் திரட்டுவது என்பது பற்றி விரிவாகச் சொன்னார்.

25 வயது… 30 வயது…

‘‘முன்பு மனிதனின் ஆயுள் காலம் 60 – 70 வருடங்களாக இருந்தது. ஆனால், இப்போது மருத்துவத்தின் மகத்துவத்தால் 80 – 90 ஆண்டுகளாக அதிகரித்துள்ளது. ஓய்வுக்குப் பிறகு, சுமார் 30 ஆண்டுகள் வாழ்க்கையைக் கழிக்க வேண்டும். அப்போது யாரையும் சார்ந்திராமல் விருப்பப்படும் வாழ்க்கையை வாழ ஓய்வுக்கால கார்ப்பஸ் வழிவகுக்கும்.

60 வயதுக்குப் பிறகு, என்ன செலவு இருக்கப்போகிறது என்று அலட்சியமாக நினைக்காதீர்கள். எதிர்காலத்தில் சூழல் எப்படி இருக்கும் என்பது தெரியாது. விலைவாசி உயரும், வாடகையில் வசித்தால் வாடகைச் செலவு இருக்கும், மின் கட்டணம், மொபைல் டேட்டா கட்டணம், மருத்துவச் செலவு இப்படிச் செலவுகளை அடுக்கிக்கொண்டே போகலாம். அப்போது நம் கையில் போதிய நிதி இல்லாவிட்டால் என்ன ஆகும் என்பதையெல்லாம் கருத்தில்கொண்டு இப்போதே முதலீட்டைத் தொடங்க வேண்டும்.

45 வயதில் ஓய்வு பெறுவது என்பது, ஓய்வு பெற்ற பிறகு மிச்சமுள்ள ஆயுள்காலத்தை எந்தவித நிதிச் சிக்கல்களும் இல்லாமல், ஆசைபட்ட வாழ்க்கையை வாழ்வதற்கு உகந்ததாக இருக்க வேண்டும். அப்படியான ஓய்வுக் காலத்துக்கு நம்முடைய தேவை, செலவுகள், மற்றும் வாழ்க்கைமுறை அனைத்தையும் உள்ளடக்கிய தொகுப்பு நிதியை நாம் உருவாக்க வேண்டும்.

ஓய்வுக்காலத்துக்கு தொகுப்பு நிதியைச் சேர்க்க, இளம் வயதிலிருந்தே ஒவ்வொரு மாதமும் வரும் வருமானத்தில் கணிசமான தொகையைத் திட்டமிட்டு நீண்டகால அடிப்படையில் சேமித்து வந்தால், 50 வயதைக் கடந்தும் இலக்கை அடைவதற்கு ஏதுவாக இருக்கும்.

ஆனால், நம்மில் பலரும் திட்டமிட்டபடி தொடர்ந்து முதலீடுகளை மேற்கொள்ளாமல், தள்ளிப்போடும் பழக்கத்தைக் கடைப்பிடிக்கிறார்கள். அதற்குப் பல காரணங்கள், சூழல்கள் இருக்கலாம். அப்படி தள்ளிப் போடுவது நம்முடைய ஓய்வுக்காலத்துக்கான முதலீட்டில் பெரிய பாதிப்பை உருவாக்கிவிடும். எனவே, 20 ஆண்டுகளுக்கான இந்த ஸ்மார்ட் பிளானில் எந்தவித பின்வாங்கலும் இருக்கக் கூடாது. தொடர்ச்சியாக முதலீட்டைக் கடைப்பிடித்து வர வேண்டியது அவசியம்.

தவிர, ஓய்வுக்காலத்துக்கான முதலீட்டை இளம் வயதிலேயே தொடங்கிவிட்டால், நாம் மாதம் தோறும் ஒதுக்க வேண்டிய முதலீட்டுத் தொகையும் குறைவாக இருக்கும். மேலும், நீண்ட காலத்துக்கு அந்த முதலீடு தொடர்வதால், அதன் வளர்ச்சியும் பெரிய அளவில் இருக்கும். இவ்வாறு இளம்பருவத் திலே முதலீடு செய்துவருவதன் மூலம் கூட்டுவட்டி முயற்சியால் முதலீடு பலமடங்கு பெருகுவதற்கு பல வாய்ப்புகள் உள்ளன. நாம் ஏற்கக்கூடிய ரிஸ்க்கின் அளவு நாம் முதலீடு செய்யக்கூடிய கால அளவைப் பொறுத்து அமைவதால், நம்மால் சரியாக பிளான் செய்ய இயலும்.

ஓய்வுக்காலத்துக்கான முதலீடானது ஓரளவு ரிஸ்க் குறைவான நல்ல வருமானம் தரக்கூடியதாக இருப்பது அவசியம். அதற்காக வங்கி வைப்பு நிதி, கடன்சார் திட்டங்களில் மட்டும் முதலீடு செய்தால், அதில் கிடைக்கும் வருமானம் நிச்சயம் போதாது. ஓய்வுக்காலம் போன்ற நீண்ட கால முதலீட்டுத் தேவைக்கு மியூச்சுவல் ஃபண்ட் மாதிரியான முதலீட்டுத் திட்டங்கள் நல்ல பலன் தரும். ஒருவர் தனது நிதி இலக்கு, ரிஸ்க் எடுக்கும் திறனை ஆய்வு செய்து, குறிப்பிட்ட அளவு தொகையை மியூச்சுவல் ஃபண்ட் போன்ற திட்டங்களில் முதலீடு செய்யலாம்.

வயது குறைவாக இருப்பவர்கள் ரிஸ்க் உள்ள பங்குச் சந்தை சார்ந்த திட்டங்களையும், நடுத்தர வயதுக்காரர்கள் பங்குச் சந்தை சார்ந்த பேலன்ஸ்டு ஃபண்டையும், 50 வயதைத் தாண்டியவர்கள் கடன் சந்தை சார்ந்த பேலன்ஸ்டு ஃபண்டையும் தேர்வு செய்யலாம். யார் எந்த ஃபண்டுகளில் எவ்வளவு முதலீடு செய்யலாம் என்பதை நிதி ஆலோசகர்களை அணுகி கேட்டுக்கொள்வது நல்லது.

உதாரணமாக, 25 வயது இளைஞர் ஒருவர் ரூ.2 கோடியை 20 ஆண்டுகளில் ஈட்ட வேண்டும் என்ற இலக்கு வைத்திருந்தால், மாதம் ரூ.20,217 முதலீடு செய்து வந்தால், அவர் அந்த இலக்கை அடையலாம். அல்லது இன்றைய வாழ்க்கைத் தரத்துக்குப் பணவீக்கத்தின் காரணமாக அவர் ரூ.5 கோடியை அடைய வேண்டுமெனில், மாதம் ஒன்றுக்கு ரூ.50,500 முதலீடு செய்ய வேண்டும். ரூ.7 கோடியை அடைய வேண்டுமெனில், மாதம் ஒன்றுக்கு ரூ.70,760 முதலீடு செய்ய வேண்டும்.

ஒருவேளை, அதே வயதுடைய இன்னொரு நபர் அந்த வயதில் முதலீட்டைத் தொடங்காமல் இருந்தால், நிதி திட்டமிடல்களைத் தள்ளிப்போடும் பழக்கமுடையவராக இருந்து, 30 வயதில் முதலீடு செய்ய ஆரம்பிக்கிறார் எனில், அவர் 45 வயதில் ஓய்வு பெற நினைத்தால், அவர் 2 கோடி ரூபாய் சேர்ப்பதற்கு மாதம் ரூ.40,000 வரை முதலீடு செய்ய வேண்டும். இது இரண்டு மடங்கு அதிகம். இளம்வயதிலேயே முதலீட்டைத் தொடங்காமல் ஐந்து ஆண்டுகள் தாமதமாகத் தொடங்கியதற்கு அவர் கொடுக்கும் விலை 100% அதிக முதலீடு. அதே சமயம், 20 ஆண்டுகள் அல்லாமல் 25 ஆண்டுகள் ஒருவர் முதலீட்டை மேற்கொண்டால், ஒரு மாதத்துக்கு ஒதுக்க வேண்டிய முதலீட்டுத் தொகை 50 சதவிகிதமாகக் குறைந்துவிடுகிறது.

உதாரணமாக, 25 ஆண்டுகள் ஒருத்தர் முதலீடு செய்து இரண்டு கோடியை அடைய வேண்டுமெனில், அவர் மாதமொன்றுக்கு ரூ.10,600 முதலீடு செய்தால் போதும். முன்னே குறிப்பிட்டுள்ள உதாரணத்தில் அவர் ரூ.20,600 சேர்க்க வேண்டிய காலகட்டத்தில் இருந்தார். ஆனால், அதை அவர் 25 ஆண்டுகளுக்குச் செய்வதாக இருந்தால், அவருடைய மாதாந்தர முதலீட்டு ஒதுக்கீடு எவ்வளவு குறைகிறது என்பது உங்களுக்கு இப்போது புரிந்திருக்கும். அதன் மூலம் நம்முடைய பொருளாதார நிலை மற்றும் தேவைக்கேற்ப நமக்கான முதலீட்டுக் காலத்தைத் தீர்மானித்துக்கொள்ளலாம்.

இதன்மூலம் எல்லோராலும் குறிப்பிட்ட நிதி இலக்கை எட்ட முடியும். எவ்வளவு சீக்கிரம் முதலீட்டைத் தொடங்கு கிறீர்களோ, அவ்வளவு சீக்கிரம் இலக்கை எட்டலாம். முதலீட்டுக் காலத்தை அதிகமாக வைத்திருந்தால் முதலீட்டுத் தொகை குறையும் என்பதை மனதில் வைத்துக்கொள்ளுங்கள்.

பணவீக்கமும் ரிட்டர்னும்

ஓய்வுக்காலத்துக்கான முதலீடானது பணவீக்கத்தைக் காட்டிலும் கூடுதலாக வருமானம் தருவதாக இருக்க வேண்டியது அவசியம். தற்போது இந்தியாவில் பணவீக்கம் 6 – 7% அளவில் இருப்பதால், நாம் குறைந்தபட்சமாக 12% ரிட்டர்ன் கிடைக்கக்கூடிய அளவில் நம் முதலீட்டைத் திட்டமிட்டு நிர்வகிக்க வேண்டும்.

இளைய பருவத்திலேயே முதலீடு செய்யத் தொடங்குவதால், முதலீட்டின் முக்கியத்துவம் புரிந்துவிடுவதுடன், உற்சாகமாக உழைக்கும் வயதில் ரிஸ்க்கையும் துணிந்து எடுக்கலாம். இதன்மூலம் வருமானம் அதிகமாகக் கிடைக்கும் வகையில் முதலீடுகளை மேற்கொள்ளலாம். தொடர்ந்து வயதாக ஆக புரொமோஷன், ஊதிய உயர்வு ஆகியவற்றின் மூலம் நம்முடைய முதலீட்டு ஒதுக்கீட்டையும் அதிகப்படுத்து வதற்கான வாய்ப்புகள் உருவாகும். இதை மனதில் வைத்துக்கொண்டு இளைய சமுதாயத்தினர் சீக்கிரம் முதலீட்டாளர்களாக மாறி வளமான ஓய்வுக்காலத்துக்காகத் தயாராகலாம். ஏனென்றால், எல்லா மனிதருக்கும் ஏதேனும் ஒரு காலகட்டத்தில் அவர்கள் செய்யும் தொழிலோ, வியாபாரமோ, வேலையோ அதிலிருந்து ஓய்வு எடுக்க வேண்டிய காலகட்டம் கண்டிப் பாக வரும். இதை மனதில் வைத்து முன்கூட்டியே திட்ட மிட்டால், அப்போது நீண்ட காலம் வாழ்வது ஒரு சுமையாக இருக்காது. ஓய்வுக்கால திட்டமிடலின் மூலம் திரட்டிய செல்வத்தைக் கொண்டு ஆனந்த மாக வாழும் வழிகளை அடையலாம்.

ஏதோ ஒரு உந்துதலில் தொடங்கிவிட்டு, இரண்டு ஆண்டுகள் முதலீடு செய்து பெறக்கூடிய விஷயம் அல்ல ஓய்வுக்காலத்துக்கான நிதி தொகுப்பை எட்டுவது. அது ஒழுக்கமாக நீண்ட காலத்துக்கு தொடர்ந்து மேற்கொள்ள வேண்டிய விஷயம் என்பதை முதலில் உணர வேண்டும். நாம் ஓய்வுக்காலத்துக்கான நிதி இலக்கைத் தொடங்கும் வயது, எத்தனை ஆண்டுகளுக்கு தொடர வேண்டும், எவ்வளவு கார்ப்பஸ் தேவை ஆகியவற்றை இலக்குகளாகக் கொண்டு அதற்கேற்ப நாம் முதலீடுகளைச் செய்வது சாலச் சிறந்ததாக இருக்கும்.

இலக்குகளுக்கு ஏற்ப அஸெட் அலொகேஷன்

நாம் முதலீடு செய்ய தயா ராகும்போது நம்மிடம் இருக்கும் உபரித் தொகை எவ்வளவு என்று பார்க்க வேண்டும். தேவையற்ற செலவுகளையெல்லாம் தவிர்த்து விட்டு, முதலீட்டுக்கான ஒதுக் கீட்டை முதலில் எடுத்து வைத்துவிட்டு, அதன் பிறகே செலவுகளை மேற்கொள்ள வேண்டும். அப்படி முதலீட்டுக்கு எடுத்து வைக்கும் தொகையை நம்முடைய நிதி இலக்குக்கு ஏற்றாற்போல் பிரித்து முதலீடு செய்வது அதாவது, டைவர்சிஃபி கேஷன் முறையில் முதலீடு செய்வது சிறந்த அணுகுமுறையாக இருக்கும்.

நம்முடைய முதலீடு நீண்ட கால அடிப்படையில் இருந்தாலும், எல்லாவற்றையும் எடுத்து பங்கு சார்ந்த திட்டங்களில் முதலீடு செய்வது சரியான அணுகுமுறை அல்ல. நம்முடைய ரிஸ்க் எடுக்கும் திறனைப் பொறுத்து, நம்முடைய முதலீட்டைத் திட்டமிட வேண்டும். 50 – 60% பங்குச் சந்தை சார்ந்த முதலீட்டிலும், 30 சதவிகிதத்தைக் கடன் சார்ந்த திட்டங்களிலும் 5 முதல் 10 சதவிகிதத்தைத் தங்கத்திலும் முதலீடு செய்ய வேண்டும்.

தங்கம் என்று இங்கு குறிப்பிடுவது பிசிக்கல் கோல்டு அல்ல; கோல்டு பத்திரத்தில் முதலீடு செய்வதாகும். இவ்வாறு செய்யப்பட்டுவந்த முதலீடு அதன் இலக்கை நெருங்கும் சமயத்தில் அதிலிருந்து ஒரு 90% எடுத்து தனியாக சிஸ்டமேட்டிக் வித்ட்ராவல் திட்டத்தில் வைத்துக் கொள்வது சிறந்ததாக இருக்கும். அதேபோல, பங்குச் சந்தை சராசரியான ஏற்றம் இல்லாமல் மிகப் பெரிய ஏற்றத்தைச் சந்தித்திருந்தால், அது அன்றைய பொருளாதாரத்தைச் சாராமல், மார்க்கெட்டில் இருக்கும் லிக்விடிட்டியால் ஏறியிருந்தால், போர்ட்ஃபோலியோவில் 20 – 30% புராஃபிட் புக் செய்து மறு முதலீடு செய்வது நீண்ட கால அடிப்படை முதலீட்டில் கூடுதலாக 1 – 2% அதிக லாபம் கிடைப்பதற்கான சாத்தியங்கள் உண்டாகும்.

முதலீடுகளைக் கண்காணித்தல்

எந்தவொரு முதலீடும் முதலீடு செய்த பின்பு, அதைக் கண்காணித்து பராமரிப்பது கட்டாயமாகிறது. முதலீடு செய்துவிட்டு பிறகு, அதைப் பார்க்காமல் விடுவது, எப்போது தேவையோ, அப்போது போய் முதலீடு எவ்வாறு வளர்ந்திருக்கிறது என்று பார்ப்பது மிகவும் தவறான அணுகுமுறை. உதாரணமாக, நாம் ஒரு மரத்தை நட்டு அதைப் பாதுகாத்து தொடர்ந்து அதற்குத் தேவையான நீர், உரம் மற்றும் சூரிய ஒளி ஆகியவற்றைத் தந்துவந்தால்தான் சின்ன கன்றானது பெரிய மரமாக வளர வாய்ப்புள்ளது. அதேபோல்தான், நம் முதலீடும் அவற்றை சரியாகப் பராமரித்து வர வேண்டும். சில நேரங்களில் சில ஃபண்டுகள் சரியாகச் செயல்படாமல் போகலாம். அவ்வாறு ஃபண்டு களில் தொய்வு இருந்தால், அவற்றை ஆராய்ந்து பார்க்க வேண்டும். அது மார்க்கெட் செயல் பாட்டின் காரணமாக இருந்தால், அதை அப்படியே தொடரலாம். இல்லை, ஃபண்ட் மேனேஜர் தவறாகக் கையாள்கிறார் எனில், அதைவிட்டு வெளியேறி, வேறு நல்ல திட்டத்தில் மறுமுதலீடு செய்வது மிகவும் அவசியமாகும். ரிடையர்மென்ட் முதலீடு தானே, ஏதோ ஒன்றை ஆரம்பிப்போம்; அது தானாக வளரும் என்ற எண்ணத்தில் முதலீடு செய்வதை நிறுத்திக்கொள்ள வேண்டும்.

நம் குழந்தைகளை நாம் பராமரிக்கும் தன்மையைப் பொறுத்தே அவர்களின் வளர்ச்சி இருக்கும். அதேபோல்தான் முதலீடும். எனவே, இதைப் புரிந்துகொண்டு நாம் செய்யும் முதலீடுகளை சராசரியாக ஆண்டுக்கு ஒரு முறை அல்லது தேவைப்படும்போது மறுபரிசீலனை செய்வதைக் கட்டாயமாக்கிக் கொள்ள வேண்டும்.

செலவுகளைத் திட்டமிடுவது

வருமானத்தை உயர்த்தும் அதே சமயம் செலவுகளைத் திட்டமிடுவதும் முக்கியம். எப்போதும் வாங்கும் சம்பளம் முழுவதற்கும் செலவுகளைத் தயாராக வைத்திருக்கக் கூடாது. அத்தியாவசியமான செலவுகளைத் தவிர, பிற செலவுகளைத் தள்ளிப்போடலாம். சம்பளத்தில் மூன்றில் ஒரு பகுதியை முதலீட்டுக்கு ஒதுக்கும் பழக்கத்தைச் செயல்படுத்துங்கள்.

இளவயதிலேயே ஆடம்பரப் பொருள் களுக்காகச் செலவு செய்வது நல்லதல்ல. அதே போல், இளம் வயதிலேயே கடன் வாங்கி வீடு வாங்குவது, கார் வாங்குவது போன்றவற்றை மேற்கொள்ளாமல் இருக்கலாம். வீட்டுக் கடன் கூட ஒருவகையில் வரி சேமிப்புக்கு உதவும். ஆனால், கார் போன்ற தேவையற்றவை செலவு களையே அதிகம் கொண்டுவரும். பெட்ரோல் செலவு, மோட்டார் இன்ஷூரன்ஸ் செலவு, பராமரிப்புச் செலவு, உதிரிபாகங்களுக்கான செலவு என அனைத்துச் செலவுகளையும் சுமக்க நேரிடும். இவற்றை எல்லாம் தவிர்த்தாலே நல்ல உபரித் தொகை கிடைக்கும். அதை முதலீடு செய்வதன் மூலம் ஓய்வுக்காலத்தில் ஆசைப்பட்ட வாழ்க்கையை வாழலாம்’’ என்றார் அவர்.

ஓய்வுக்காலத்துக்கென சேர்க்கும் முதலீட்டை இடையில் எடுக்கக் கூடாது. எந்தத் தேவைக்காக முதலீடு செய்கிறோமோ, அது பூர்த்தி ஆகும் வரை அதில் கைவைக்காமல் இருப்பதுதான் நல்ல முதலீட்டாளருக்கு அழகு. குறுகிய கால தேவைகளுக்கான நிதியை அதற்கேற்ப குறுகிய கால முதலீட்டுத் திட்டங் களில் முதலீடு செய்து பயன்படுத்திக் கொள்ளலாம். அந்தந்தத் தேவைகளுக்கு ஏற்றபடி தனித்தனியாக முதலீடுகளை மேற்கொள்வதன் மூலம் ஓய்வுக்கால முதலீட்டில் கைவைக்கும் செயல்பாடுகளை நிச்சயம் தவிர்க்க முடியும்.

இவை எல்லாவற்றுக்கும் இடையில் உங்களு டைய உடல் ஆரோக்கியத்திலும் கவனம் எடுத்துக்கொள்ளுங்கள். ஆரோக்கியமாக இருப்பது நிகழ்காலத்திலும் உற்சாகமாக இயங்க வைக்கும்; ஓய்வுக்காலத்திலும் வாழ்க்கையை ரசிக்க உதவியாக இருக்கும். சுவர் இருந்தால்தானே சித்திரம் வரைய முடியும்.

45 வயதில் ஓய்வு பெற்று, உங்களுக்குப் பிடித்த மாதிரியான வாழ்க்கையை வாழ நினைத்தால், இந்தக் கட்டுரையில் சொல்லப் பட்டுள்ள வழிமுறைகளைப் பின்பற்றி பயனடையுங்கள்!

வருமானத்தை உயர்த்துவதற்கான வழிகள்..!

‘‘சரி, 45 வயதில் ஓய்வு பெறும் பிளானெல்லாம் ஓகே. ஆனால், மாதம்தோறும் 20,000 ரூபாய் முதலீடு செய்ய வேண்டுமெனில், மாத வருமானம் 50 ஆயிரமாவது இருக்க வேண்டுமே என்று நீங்கள் கேட்பது புரிகிறது. இங்கு கொடுத்திருப்பது குறிப்பிட்ட கார்ப்பஸ் தொகைக்கான கணக்கீடு மட்டுமே. ஆனால், ஒவ்வொருவரும் தங்களுடைய வருமானத்தில் மூன்றில் ஒரு பகுதியை முதலீடு செய்யத் தொடங்கலாம். படிப்படியாக வருமானத்தை உயர்த்தி, முதலீட்டுத் தொகையை இந்தக் கணக்கீட்டுக்கு உயர்த்திக்கொள்ள பாருங்கள். சேமிப்பு, செலவு, முதலீடு ஆகியவற்றை மேற்கொள்ளும் அதே சமயம், வருமானத்தை உயர்த்தும் வழிகளையும் தொடர்ந்து செயல்படுத்தி வர வேண்டும். அதற்கு முதலில் எந்தத் துறையில் நாம் இருக்கிறோமோ, அந்தத் துறையில் வளர்வதற்கான திறன்கள் என்னென்ன என்று பார்த்து அவற்றை வளர்த்துக்கொள்ள வேண்டும். ஐ.டி துறை எனில், அதில் அடுத்தடுத்து என்ன தொழில்நுட்பங்களைக் கற்றுக்கொண்டால் பதவி உயர்வு, அதிக ஊதியம் பெறலாம் என்று பார்க்க வேண்டும். மார்க்கெட்டிங் துறையில் இருப்பவராக இருந்தால் எல்லோரையும் கவரும் பேச்சை எப்படி வளர்த்துக் கொள்ளலாம் என்று பார்க்க வேண்டும். பிசினஸ் செய்பவர்கள் தொடர்ந்து டேர்ன் ஓவரை அதிகப்படுத்துவதற்கான வழிகளைத் தேட வேண்டும். இப்படி அவரவர் துறைக்கு ஏற்ப சுய திறன்களை முதலில் மேம்படுத்திக்கொள்ள வேண்டும். ஒரே இடத்தில் ஒரே வேலையில் ஒரே ஊதியத்தில் இருந்துவிடக் கூடாது” என்றார் சுரேஷ் பார்த்தசாரதி.